Pubblicato su Politica Domani Num 22 - Febbraio 2003

O migliaccio

Pe ffà o migliaccio nun ce vò niente.
Pigliate ne panno e culore, jate a puteca, e accattate nu litro e mmiezo e latte, nu quarto e semmola, miezu chilo e zucchero, cinche ove e cientocinquanta gramme e burro.
Pò attaccate tutte cose rinto o panno, jat'a casa, pigliate na tiana, mettitela ngoppo o ffuoco, e arinto mettitece o llatte, o burro e o zzucchero. A'mmente si scarfa, girate chianu chianu, quanno iesce a bbollere, vuttatice a semmola, chianu, chianu comme se vulisseve fà a farenate; ammusciat'o o ffuoco e cu a cucchiara e lignamme girate chianu chianu pe ddiece minute quase.
Pò, mettitelo a refreddà, e mmente s'arrefredda, pigliate ll'ove e spartite e pperozzele ra felinia; pò sguazzeriate bbuone e pperozzele e a felinia, e appena s'è raffreddata a semmola, vuttatece e pperozzele, e ammiscatele bbuono, e pò ce vuttate pure a felinia. Pò pigliate nu bbellu ruoto, vugnitelo ca nzogna, e mmettitece sta rroba a rinto, e nfurnate. Facitelo cocere pe n'ora e nu quarto, e pò o luate.
Si pò o vulite fa cchiù sapurito, jate addò Ron Giacomo, accattate na busta e vainiglia, tagliate a ppezzulli piccirille na scorza e limone, una e portualle, e una e mndarino e, primmo e nfurnà, ci'o buttate a rinto.
Roppo sfurnato, facitelo arrefreddà, pigliate na vranca e zucchero, e ce a spannite a coppo.
Pò tagliate a felle e … mangiate!

[da "O PPANE E MAMELLA…", Quaderni di cultura popolare n.1, Edizione ZEZI,
Cooperativa Culturale del Gruppo Operaio di Pomigliano d'Arco, dic.'85-apr.'86]